അവകാശങ്ങൾ ഇനിയുമുണ്ട് ;അഖിൽ ദേവ് എഴുതുന്നു

കണ്ണങ്കോട്   കോളനിയിൽ താമസിക്കുന്ന ഏകദേശം 158 കുടുംബങ്ങൾക്ക് ഇന്ന് പട്ടയം ലഭിച്ചു. ഓരോ മനുഷ്യനും അവരുടേതായ ഭൂമി കൈവശപ്പെടുത്താൻ അവകാശമുള്ളവരാണ് .

അതിനായി അശ്രാന്ത പരിശ്രമം നടത്തിയ എല്ലാവരോടും സ്നേഹം മാത്രം .

കണ്ണങ്കോട്  പട്ടിക ജാതി / വർഗ്ഗ കോളനിയിൽ  ടീം ചുവടിന്റെ  ഭാഗമായി ഞാൻ പോയിരുന്നു മനുഷ്യർ താമസിക്കുന്നിടമാണോ  എന്ന്  തോന്നിപോകുന്നൊരിടം ?

നിരവധി വീടുകൾ തകർന്നു കിടപ്പുണ്ട് ,കുറച്ചു തകരാറായ  അവസ്ഥയിലും . എല്ലാം അങ്ങനെയായിരിക്കുമോ എന്ന് ചോദിച്ചാൽ അങ്ങനെയല്ല.

എന്നിരുന്നാലും, തകർച്ചയുടെ വക്കിലുള്ള വീടുകൾ, ശരിയായി അടച്ചുറപ്പില്ലാത്ത ശൗചാലയങ്ങൾ , കുടിവെള്ളത്തിന്റെ അപര്യാപ്തത .

പട്ടികജാതി കോളനി സന്ദർശിച്ചാൽ എല്ലായിടത്തും  കാണുന്നപോലെ , ഉപേക്ഷിക്കപ്പെട്ട ഏതാനും കോൺക്രീറ്റ് നിർമ്മിതികൾ കാണാൻ കഴിയും. കണ്ണങ്കോട് കോളനിയിലുമുണ്ട്  25 ലക്ഷം രൂപ ചിലവഴിച്ചു കുടി വെള്ളത്തിന്റെ പദ്ധതി എന്ന് പറഞ്ഞു പാതി വഴിയിൽ ഉപേക്ഷിച്ച്  ഇട്ടിരിക്കുന്ന  ഒരു ഭീമാകാരമായ ടാങ്ക്  . ഉപയോഗമില്ലാത്ത ഒരു പാഴ് വസ്തുവിനെ പോലെ മഴവെള്ളം കെട്ടി കിടന്ന് കൊതുക് വളരുവാൻ വേണ്ടി അതങ്ങനെ നിൽപ്പുണ്ട് .തലയുർത്തി പിടിച്ച് .

പട്ടികജാതി/പട്ടികവർഗ വിഭാഗങ്ങളുടെ ഉന്നമനത്തിനായി ത്രിതല പഞ്ചായത്തും സർക്കാരും ഓരോ വർഷത്തിലും പദ്ധതികൾ തയ്യാറാക്കി ഫണ്ട് അനുവദിക്കാറുണ്ട്. എന്നാൽ പദ്ധതികൾക്ക് തുടക്കം കുറിക്കുന്നതും പാതിവഴിയിൽ ഉപേക്ഷിക്കുന്നതും പതിവ് കാഴ്ചയാണ്. പരാതികൾ  നൽകാനോ  മറ്റും ഇവർ പോകില്ല എന്നുള്ള കൃത്യമായുള്ള വിശ്വാസമാണ്  ഈ വ്യക്തികൾക്ക് അപാരമായ ധൈര്യംനൽകുന്നത് .
എന്റെ കാഴ്ചപ്പാടിൽ കണ്ണങ്കോട് ദളിത് കോളനികൾ കാൽനടയായിപ്പോലും കടന്നുപോകാൻ കഴിയാത്ത രണ്ട് വഴികളുള്ള പ്രദേശമാണ്, എന്തെങ്കിലും ഒരു അപകടമുണ്ടായാൽ വാഹനം  എത്തുന്ന റോഡ് വരെ ചുമന്ന് കൊണ്ട് പോകണം .
അതിനൊരു പരിഹാരം കാണാൻ
അനുയോജ്യമായ വാഹനം കയറി ചെല്ലുന്ന  വഴി ആവശ്യമാണ് .

ആ ജനത  വഴി ആവശ്യപ്പെടുന്നതിന്റെ കാരണം കൃത്യമായി വിശദീകരിക്കാൻ എനിക്ക് കഴിയും .

PMAY / ലൈഫ് പദ്ധതികളിലൂടെ നിരവധി പേർക്ക് വീട് നൽകുന്നു , എന്നിരുന്നാലും, സർക്കാർ നൽകുന്ന ഫണ്ട് ഉപയോഗിച്ച് ഒരു വീട് പൂർണ്ണമായും നിർമ്മിക്കാൻ കഴിയുമോ എന്ന് ഇത് വായിക്കുന്ന എല്ലാവരും ചിന്തിക്കേണ്ടതുണ്ട് .

വ്യത്യസ്‌ത കാഴ്ചപ്പാടുള്ളവർ തങ്ങളുടെ വാദങ്ങൾ അവതരിപ്പിക്കണം.

എന്നിരുന്നാലും, അവരുടെ വസ്തുവകകളിലേക്ക് ഒരു വീട് നിർമിക്കേണ്ട  സാധന സാമഗ്രിഹികൾ  എത്തിക്കുന്നതിന്റെ ബുദ്ധിമുട്ട്  ആരെങ്കിലും ചിന്തിച്ചിട്ടുണ്ടോ , വീടിന് ആവശ്യമായ സാധനങ്ങൾ  റോഡ് സൈഡിൽ ഇറക്കി അവിടെനിന്നും ചുമന്ന് വേണം  അവരുടെ  വസ്തുവിലേക്ക്  എത്തിക്കാൻ.  വീട് മാത്രമല്ല എന്തായാലും  അവസ്ഥ ഇങ്ങനെയാണ് . ദിവസ വേതനത്തിന് കൂലിപ്പണിക്ക് പോകുന്നവർ ,  അതും എല്ല ദിവസവും പണി ഉണ്ടാകണമെന്നുമില്ല

ആ ജനതയ്ക്ക് ഒരു വീട് വയ്ക്കണം എങ്കിൽ ചുമട്ട് കൂലി തന്നെ നമ്മളുദ്ദേശിക്കുന്നതിലും  കൂടുതലായിരിക്കും,

അവർക്ക് ഇനി ആവശ്യമുള്ളത്  കുടിവെള്ളവും കോൺക്രീറ്റ്  ചെയ്ത നല്ലൊരു  റോഡുമാണ്,  ഇനിയും ഭരണ കൂടം അവരെ  കാണാതിരിക്കരുത്