പെട്രോളുമായി 110 കെവി വൈദ്യുതി ടവറിൽ യുവാവ്; ‘പറഞ്ഞ പെൺകുട്ടിയെ’ സ്ഥലത്തെത്തിച്ച് പൊലീസ്

പെട്രോൾ കുപ്പിയുമായി 110 കെവി വൈദ്യുതി ടവറിൽ കയറി ആത്മഹത്യാ ഭീഷണി മുഴക്കി യുവാവ്. ഇന്നലെ രാത്രി 9.30 ന് അടൂരായിരുന്നു നാടകീയ രംഗങ്ങൾ അരങ്ങേറിയത്. താൻ സ്നേഹിക്കുന്ന പെൺകുട്ടിയെ സ്ഥലത്ത് എത്തിച്ചാൽ മാത്രമേ താഴെ ഇറങ്ങൂ എന്നായിരുന്നു യുവാവിൻ്റെ നിലപാട്.

മാലക്കോട് പറക്കോട് വീട്ടിൽ രതീഷ് ദിവാകരൻ (39) ആണ് ടവറിൽ കയറി ആത്മഹത്യാ ഭീഷണി മുഴക്കിയത്. ഒടുവിൽ രതീഷ് പറഞ്ഞ പെൺകുട്ടിയെ പോലീസ് സ്ഥലത്തെത്തിച്ച ശേഷമാണ് രതീഷ് താഴെയിറങ്ങാൻ സമ്മതിച്ചത്. പിന്നാലെ അഗ്നിരക്ഷാ സേനയുടെയും നാട്ടുകാരുടേയും പോലീസിന്റേയും സഹകരണത്തോടെ രതീഷിനെ താഴെയിറക്കി.

വെള്ളിയാഴ്ച രാത്രി 9.30നായിരുന്നു രതീഷ് ടവറിൽ കയറിയത്. മൂന്നര മണിക്കൂർ നീണ്ട പരിശ്രമത്തിനു ശേഷം ശനിയാഴ്ച പുലർച്ചെ ഒരു മണിയോടെയാണ് ഇയാളെ താഴെയിറക്കാനായത്. * ചുവട് ന്യൂസ്‌ *