തൃശൂരിൽ എ.ടി.എമ്മുകൾ കൊള്ളയടിച്ചു. മാപ്രാണം, കോലഴി, ഷൊർണൂർ റോഡ് എന്നിവിടങ്ങളിലെ എ.ടി.എമ്മുകളാണ് തകർത്ത് പണം കവർന്നത്. പുലർച്ചെ മൂന്നിനും നാലിനും മധ്യേയായിരുന്നു കവർച്ച. കാറിലെത്തിയ നാലംഗസംഘം ഗ്യാസ് കട്ടർ ഉപയോഗിച്ചാണ് എ.ടി.എം തകർത്തത്. മൂന്ന് എ.ടി.എമ്മുകളിൽനിന്നായി 65 ലക്ഷം രൂപ നഷ്‌ടപ്പെട്ടു
രണ്ട് എസ്ബിഐ എടിഎമ്മുകളും ഒരു സ്വകാര്യ ബാങ്കിന്റെ എടിഎമ്മുമാണ് കൊളളയടിച്ചത്. മോഷ്‌ടാക്കൾ എടിഎം തകർത്തതോടെ എടിഎമ്മിൽ നിന്ന് ബാങ്ക് ഉദ്യോഗസ്ഥർക്ക് സന്ദേശമെത്തുകയായിരുന്നു. പിന്നാലെ ബാങ്ക് ഉദ്യോഗസ്‌ഥരാണ് പൊലീസിനെ വിവരമറിയിക്കുന്നത്. രാത്രി പട്രോൾ നടത്തുന്ന പൊലീസ് സംഘം എത്തുമ്പോഴേക്കും പ്രതികൾ പണവുമായി കടന്നിരുന്നു.
