യുവാവിനെ കൊലപ്പെടുത്താൻ ക്വട്ടേഷൻ സംഘത്തിന്റെ ശ്രമം. ആക്രമണത്തിനെത്തിയ ക്വട്ടേഷൻ സംഘത്തിലെ രണ്ട് പേർ പിടിയിൽ. വെള്ളനാട് കൂവക്കുടി ലക്ഷംവീട് കോളനി നിവാസിയായ 25-കാരനായ അരുണിനെയാണ് അക്രമികൾ കൊലപ്പെടുത്താൻ ശ്രമിച്ചത്. 25,000 രൂപയ്ക്കായിരുന്നു സംഘം യുവാവിനെ ആക്രമത്തിച്ചത്.
ആക്രമണം തടയാനെത്തിയ യുവാവിന്റെ അമ്മയെയും പ്രതികൾ ആക്രമിച്ചു. ഇന്ന് വൈകിട്ടോടെയാണ് സംഭവം. വീട്ടിൽ നിന്നും പുറത്തിറങ്ങിയ അരുണിനെ രണ്ടംഗ സംഘം ക്രിക്കറ്റ് ബാറ്റും കത്തിയുമുപയോഗിച്ച് ആക്രമിക്കുകയായിരുന്നു. ആക്രമണം തടയാൻ ശ്രമിക്കുന്നതിനിടയിൽ യുവാവിന്റെ അമ്മയ്ക്കും ആക്രമണത്തിൽ പരിക്കേറ്റു.
വീട്ടിലെ ബഹളം കേട്ട് ഓടികൂടിയ നാട്ടുകാരാണ് അക്രമികളെ പിടികൂടിയത്. യുവാവിനെ കൊലപ്പെടുത്താൻ ക്വട്ടേഷൻ സംഘം 25,000 രൂപ വാങ്ങിയെന്നാണ് പോലീസിൻ്റെ കണ്ടെത്തൽ. പരിക്കേറ്റ അരുണിനെയും അമ്മയെയും ജില്ലാശുപത്രിയിൽ പ്രവേശിപ്പിച്ചു. സംഭവത്തിൽ പോലീസ് കേസെടുത്തിട്ടുണ്ട്.
